लाइन काटिएका अधिकांश उद्योगमा जोड्यो प्राधिकरणले विद्युत्

काठमाडौं । डेडिकेटेड तथा ट्रंकलाइन महसुल विवादमा उद्योगमा काटिएका विद्युतका लाइन जोडिएका छन् । 

नेपाल विद्युत् प्राधिकरण सञ्चालक समितिको मंगलबार बसेको बैठकले काटिएका लाइन जोड्ने निर्णय गरेको हो । मन्त्रिपरिषद्को निर्णय कार्यान्वयन गर्दै १५ दिन भित्र बक्यौता उठाउने पनि बैठकले निर्णय गरेको छ । 

प्राधिकरणले टीओडी मिटरको आधारमा बिल दिनुपर्ने र उद्योगीले सोको आधारमा बक्यौता तिर्नुपर्ने बताउँदै बिल दिन नसके प्राधिकरणका कर्मचारी माथि र बक्यौता नतिरे उद्योगी माथि कारबाही हुने उर्जा मन्त्रालयले जनाएको छ । 

प्राधिकरणले विवादित बक्यौता रहेका २८ उद्योगको लाइन यही कात्तिक ८ गते काटेको थियो । केहीले प्राधिकरणको किस्ता सुविधा अनुसार पहिलो किस्ता तिरे पछि केही लाइन काटिएर पनि जोडिएको थियो । अहिले सरकारको निर्णय कार्यान्वयन गर्दै काटिएका २८ उद्योगको नै लाइन जोडिएको प्राधिकरणले जनाएको छ । 

सरकारले आइतबार नै उद्योगका काटिएका लाइन जोड्ने निर्णय पछि मन्त्री खड्काले सोमबार नै प्राधिकरण सञ्चालक समिति बैठक डाकेका थिए । तर, केही समिति सदस्य उपत्यका बाहिर भएका कारण कोरम नपुगे पछि मंगलबार पुनः बैठक बसेको हो । यही आइतबारको नेपाल सरकार मन्त्रिपरिषद् बैठकले काटिएका लाइन जोड्न र टाइम अफ डे अर्थात टीओडी मिटरका आधारमा १५ दिनभित्र विवादित बक्यौता उठाउने निर्णय गरेको थियो । 

सो बैठकले लाल आयोग प्रतिवेदन कार्यान्वयन गर्न पनि निर्देशन दिएको थियो । प्राधिकरणका अनुसार डेडिकेटेड तथा ट्रंकलाइन बक्यौता हाल सम्म करिब २२ अर्ब पुगेको छ ।