यु-१९ महिला विश्वकप छनोट : नेपाल आज युएई सँग भिड्दै

काठमाडौं । आईसीसी यु-१९ महिला टी-२० विश्वकप एसिया छनोटको अन्तिम खेलमा आज नेपालले युनाइटेड अरब इमिरेट्स (युएई)सँग खेल्दै छ । 

खेल यूएईको द सेभेन्स स्टेडियममा नेपाली समय अनुसार दिउँसो ३ बजे शुुरु हुनेछ । यूएई तालिकाको शीर्ष र नेपाल दोस्रो स्थानमा छ । जारी प्रतियोगितामा पाँच खेलमा चार खेलमा  जित र एक खेलमा हार बेहोरेको नेपाल ८ अंकका साथ तालिकाको दोस्रो स्थानमा छ । नेपालले हार बेहोरेको यूएई सँग पराजित भएको थियो ।  

सन् २०२५ मा मलेसियामा हुने विश्वकपमा स्थान बनाउनका लागि यो खेल महत्वपूर्ण छ । यो खेल हारेमा नेपालको पहिलो पटक विश्वकपमा छनोट हुने सपना अधुरोनै रहनेछ ।  यूएई प्रतियोगितामा अपराजित रहेको छ । उसको पाँच खेल बाट दश अंक छ । नेपालले जित हात पारे दुवै टिमको समान दश अंक हुनेछ । त्यसपछि नेट रन रेटको आधारमा शीर्ष स्थानमा रहने टोली विश्वकपका लागि छनोट हुनेछ । 

जारी प्रतियोगितामा सहभागी चार टोली मध्ये शीर्ष स्थान हासिल गर्ने टोली आइसीसी यु–१९ महिला टि–२० विश्वकपका लागि छनोट हुनेछ । यु–१९ विश्वकप क्रिकेट प्रतियोगिता अर्को वर्ष मलेसियामा हुँदैछ ।