अरब र इस्लामिक देश द्वारा इजरायलको निन्दा

एजेन्सी । अरब र इस्लामिक देशहरुले गाजा र लेबनानमा इजरायलले ‘नरसंहार’ गरेको भन्दै निन्दा गरेका छन् । 

साउदी अरबको रियादमा भएको अरब र इस्लामिक देशहरुको आपतकालीन शिखर सम्मेलनमा सहभागीहरुले इजरायलको निन्दा गर्दै आक्रमण रोक्नुपर्नेमा जोड दिएका हुन् । 

अन्तर्राष्ट्रिय सञ्चार माध्यमका अनुसार मध्यपूर्वमा शान्ति स्थापनाका लागि अन्तर्राष्ट्रिय समुदायलाई पहल गर्न समेत अरब र इस्लामिक देशहरुले माग गरेका छन् । सम्मेलनमा साउदी अरबका राजकुमार मोहम्मद बिन सलमानले तुरुन्त युद्धविराम गर्न र इरान माथिको इरानको सम्प्रभुताको सम्मान गर्न पनि अपिल गरे । 

प्यालेस्टिनी प्राधिकरणका अध्यक्ष महमुद अब्बासले गाजा क्षेत्रमा प्यालेस्टाइनको अभिन्न अंग भएको बताए । इजिप्टका राष्ट्रपति अब्दुल फतह अल सिसीले लेबनानका नागरिकलाई आवश्यक सबै सहयोग गर्ने बताए । अरब लिगका महासचिव अहमद अबुल घितले संयुक्त राष्ट्रसंघले इजरायलको सदस्यता निलम्बन गर्नुपर्ने बताएका थिए ।  

सम्मेलनमा युएई सहित इराक, सिरिया, इजिप्ट, जोर्डन, कतार र पाकिस्तान लगायत देशका सरकार र राष्ट्रप्रमुखहरुको सहभागिता थियो ।