हिरासतबाटै रविको बिफ्रिङ- मेरो पक्राउ राजनीतिक प्रतिशोध, नबुझ्ने सर्वसाधारणलाई बुझाइदिनु

काठमाडौं । सहकारी ठगी तथा संगठित अपराधको कसुरमा फक्राउ परेका राष्ट्रिय स्वतन्त्र पार्टीका सभापति रवि लामिछाने, उपसभापति डीपी अर्याल र डा. स्वर्णिम वाग्लेबीच सोमबार हिरासतमै भेटघाट भएको छ ।

उक्त भेटघाटमा सभापति लामिछानेले उपसभापतिद्वय अर्याल र वाग्लेसँग कुराकानी गर्दै आफ्नो पक्राउ राजनीतिक प्रतिशोध भएको जनतालाई बुझाउनुपर्ने बताएका छन् । हिरासतमा नराखेरै अनुसन्धान गर्न सकिने भएपनि सत्तापक्षले राजनीतिक प्रतिशोधका कारण आफुलाई हिरासतमा राखेको लामिछानेले भनेका थिए ।

‘हामीले गरिरहेको आन्दोलन राजनीतिक प्रतिशोधविरुद्ध भएको कुरा सर्वसाधारण नागरिकले बुझिराख्नुभएको छ कि छैन, सबैलाई राजनीतिक प्रतिशोध भएको स्पष्टसँग बुझाइदिनुहोला । रवि लामिछानेको भनाइ उदृत गर्दै उपसभापति अर्यालले भने ।’

सभापति लामिछाने पक्राउको विरोधमा रास्वपाले आन्दोलनलाई निरन्तरता दिने उपसभापति अर्याल बताउँछन् । आफ्ना सभापति लामिछानेप्रति वर्तमान सरकार हदैसम्मको निर्दयी भएको उनको भनाइ छ ।

‘सभापति लामिछानेलाई अनावश्यक हिरासतमा राखिएको हो । रास्वपा विधिको शासनमा अटल विश्वास राख्छ’, ‘उपसभापति वाग्ले भन्छन्, ‘सरकारले कानुनी छिद्रको दुरुपयोग गरिरहेको छ ।’

सभापति लामिछानेलाई भेटेर फर्किएपछि उपसभापति अर्याल र वाग्लेले आगामी दिनमा हुने विरोधका कार्यक्रम बुधबार सार्वजनिक गर्ने जानकारी दिए ।

सभापति लामिछानेलाई सहकारीको रकम गैरकानुनी रुपमा अपचलन गरेको आरोपमा कात्तिक २ गते प्रहरीले पक्राउ गरेको थियो । लामिछानेलाई आइतबार चौथो पटक जिल्ला अदालत कास्कीले थप १३ दिन हिरासतमा राख्न अनुमति दिएको छ ।