बायर्न म्युनिखलाई हराउदै लाइप्जीगले जित्यो सुपरकपको उपाधि

साविक विजेता तथा कीर्तिमानी १० पल्टको च्याम्पियन बायर्न म्युनिखमाथि सानदार जित दर्ता गर्दै आरबी लाइप्जिग पहिलोपल्ट जर्मन सुपर कपको च्याम्पियन बनेको छ । लगातार तीन संस्करणको च्याम्पियन बायर्नमाथि ३–० को सानदार जित दर्ता गर्दै  लाइप्जिग  च्याम्पियन बन्न सफल भएको हो । लाइप्जिगका लागि स्पेनिस विंगर डानी ओल्मोले ह्याट्रिक गरे । यस जितसँगै लाइप्जिगले गत संस्करणको फाइनलमा भोगेको हारको बदला लिएको छ । गत संस्करणमा बायर्नले ५–३ को जित निकाल्दै च्याम्पियन बनेको थियो । बायर्नले ६३औं मिनेटमा भर्खरै क्लबमा अनुबन्ध भएका इंग्लिस फरवार्ड ह्यारी केनलाई खेलाएपनि खेललाई बदल्न सकेन । जर्मन सुपर कपमा लाइप्जिग पहिलोपल्ट च्याम्पियन बनेको हो । लाइप्जिग गत संस्करणमा फाइनलमा पुगेपनि उपाधि जित्न सकेको थिएन ।