यु–१९ महिला विश्वकप क्रिकेट : नेपालले आज युएई विरुद्व खेल्ने

काठमाडौं । आइसीसी यु–१९ महिला टि–२० विश्वकप एसिया छनोट अन्तर्गत नेपालले शनिबार आफ्नो तेस्रो खेल युनाइटेड अरब इमिरेट्स (युएई)विरुद्व खेल्ने भएको छ । 

नेपालले युएई विरुद्ध उसकै भूमिमा शनिबारको खेल खेल्न लागेको हो । उक्त खेल शनिबार बिहान सवा ११ बजे शुरु हुने छ । बुधबार देखि शुरु भएको प्रतियोगितामा नेपालले पहिलो खेल थाइल्याण्ड सँग खेलेको थियो । उक्त खेलमा नेपालले थाइल्याण्डलाई ६७ रनको फराकिलो अन्तरले पराजित गरेको थियो । 

नेपालले आफ्नो दोस्रो खेल बिहीबार कुवेत सँग खेलेको थियो । उक्त खेलमा नेपालले कुवेतलाई एक सय आठ रनले हराएको थियो । प्रतियोगितामा आयोजक युएई सहित नेपाल, कुवेत र थाइल्याण्ड सहभागी छन् । 

सहभागी चार टोली मध्ये शीर्ष स्थान हासिल गर्ने टोली आइसीसी यु–१९ महिला टि–२० विश्वकपका लागि छनोट हुनेछ । यु–१९ विश्वकप क्रिकेट प्रतियोगिता अर्को वर्ष जनवरीमा मलेसियामा आयोजना हुँदैछ ।
रासस