महिला यु–१९ क्रिकेट : नेपालले आज कुवेत सँग प्रतिस्पर्धा गर्दै

काठमाडौं । आइसिसी महिला यु–१९ विश्वकपको एसिया छनोटमा नेपालले बिहीबार कुवेत सँग प्रतिस्पर्धा गर्दैछ ।

संयुक्त अरब इमिरेट्स (युएई) को द सेभेन क्रिकेट रङ्गशालामा हुने खेल नेपाली समय अनुसार बिहान सवा ११ बजे शुरु हुने छ । प्रतियोगिताको आफ्नो पहिलो खेलमा थाइल्यान्डलाई ६७ रनले पराजित गर्दै विजयी सुरुवात गरेको नेपाल लगातार दोस्रो जितको खोजिमा छ । 

बुधबार भएको प्रतियोगिताको उद्घाटन खेलमा घरेलु टोली यूएईले कुवेतलाई १ सय ३ रनले पराजित गरेको थियो । कुवेत यस खेलमा पुनरागमन गर्ने लक्ष्यमा हुने छ । कात्तिक २९ गते सम्म चल्ने प्रतियोगितामा नेपाल, घरेलु टोली, कुवेत र थाइल्यान्डको सहभागिता रहेको छ ।  

यही कात्तिक २९ गते सम्म चल्ने उक्त प्रतियोगितामा आयोजक युएई सहित नेपाल, कुवेत र थाइल्याण्ड सहभागी छन् । सहभागी चार टोली मध्ये शीर्ष स्थान हासिल गर्ने टोली विश्वकपमा छनोट हुनेछ ।

विश्वकप क्रिकेट प्रतियोगिता अर्को वर्ष मलेसियामा आयोजना हुँदैछ ।