अमेरिकी राष्ट्रपति चुनाव : ट्रम्पलाई सुरुवाती अग्रता

एजेन्सी । अमेरिकी राष्ट्रपतिको निर्वाचनका लागि मंगलबार भएको मतदानको मतगणना शुरु भएको छ । 

पचास मध्ये दुई राज्यको नतिजा आएको छ । इन्डियना र केन्टकीमा भएको मतगणना ट्रम्पले १९ र ह्यारिसले ३ इलेक्टोरल मत पाएका हुन । लोकप्रिय मतमा ट्रम्पले ५४ दशमलब ४ प्रतिशत र ह्यारिसले ४४ दशमलब ८ प्रतिशत मत पाएका छन् । 

आगामी राष्ट्रपति निर्वाचन पेन्सिलभेनिया, मिसिगन, विस्कन्सिन, जर्जिया, नर्थ क्यारोलाइना, एरिजोना र नेभाडा निर्णायक हुने मानिएको छ । हाल सम्म पनि यी राज्यको ९३ इलेक्टोरल मत कुन उम्मेदवारलाई जान्छ भन्ने यकिन नभएको अन्तर्राष्ट्रिय सञ्चार माध्यमले जनाएको छ । 

राष्ट्रपतिमा निर्वाचित हुन कुल ५ सय ३८ इलेक्टोरल मत मध्ये कम्तीमा २ सय ७० ल्याउन आवश्यक हुन्छ । अमेरिकाका ५० राज्यका लागि जनसंख्याका आधारमा ५ सय ३५ र संघीय राजधानी ‘डिस्ट्रिक्ट अफ कोलम्बिया’ का लागि ३ इलेक्टोरल मत निर्धारण गरिएको छ । दुई उम्मेदवार मध्ये ह्यारिसले सबै भन्दा बढी इलेक्टोरल मत रहेको क्यालिफोर्निया ५४, न्युयोर्कमा २८ र इलिनोई १९ सहित २ सय २६ इलेक्टोरल मत ल्याउने लगभग निश्चित छ । 

यो अवस्थामा राष्ट्रपतिमा निर्वाचित हुन ह्यारिसलाई ‘स्विङ स्टेट्स’ को ९३ मध्ये कम्तीमा ४४ इलेक्टोरल मत आवश्यक पर्छ । ट्रम्पले टेक्सासको ४०, फ्लोरिडाको ३०, ओहायोको १७ सहित कम्तीमा २ सय १९ इलेक्टोरल मत पाउने निश्चित भइसकेको छ । राष्ट्रपतिमा निर्वाचित हुन उनले अब ९३ मध्ये कम्तीमा ५१ इलेक्टोरल मत ल्याउनै पर्छ ।