नवलपरासीमा देउसी भैलो समूहको गाडी दुर्घटना हुँदा १० जना घाइते

नवलपरासी । पश्चिम नवलपरासीको सुस्तामा देउसी भैलो खेल्ने समूह बोकेर हिँडेको गाडी दुर्घटना हुँदा १० जना घाइते भएका छन् ।

शनिबार आज साँझ सुस्ता गाउँपालिका वडा नम्बर ३ बिगेपस्थित भित्री सडक खण्डमा लु ३ च ६०३२ नम्बरको पिकअप गाडी दुर्घटना भएको प्रहरीले जनाएको छ ।

देउसी भैलो टोली बोकेर हिँडेको पिकअप गाडीले बाख्रालाई जोगाउने क्रममा अनियन्त्रित भई दुर्घटना भएको जिल्ला प्रहरी कार्यालय पश्चिम नवलपरासीले जानकारी दिएको छ ।

दुर्घटनामा परि १० जना घाइते भएका छन् । उनीहरूमध्ये ४ जनाको अवस्था मध्यम र ६ जनाको अवस्था सामान्य रहेको प्रहरीको भनाइ छ ।

घाइतेहरूलाई उपचारका लागि सहिद स्मृति अस्पताल चौपत्ता लगिएको छ । भ्यानमा २५ जना सवार रहेको प्रहरीले बताएको छ ।