सर्लाहीको बरहथवा बजारमा आगलागी हुँदा पौने ३ करोडको क्षति

सर्लाही । सर्लाहीको बरहथवा नगरपालिका–७, बरहथवा बजारमा शुक्रबार राति भएको भीषण आगलागी बाट ठूलो मात्रामा धनमालको क्षति भएको छ । 

स्थानीय किसुन दासको घरमा सञ्चालित विभिन्न पसलमा भएको आगलागी बाट व्यापक क्षति पुगेको हो । आगलागी बाट नरेश साहले सञ्चालन गरेको राजवीर होलसेल किराना पसल, विजय दासको आलु भण्डार र सरोज राउत कुर्मीको कपडा सिलाउने टेलरमा क्षति पुगेको इलाका प्रहरी कार्यालय बरहथवाले जनाएको छ । 

आगलागी बाट करिब पौने तीन करोड बराबरको क्षति भएको अनुमान छ । नरेश साहको किराना पसलमा चाडपर्वका लागि धेरै सामग्री गोदाम गरेर राखिएकाले आगलागी बाट सोही पसलमा बढी क्षति पुगेको छ । 

आगलागीका कारण खुल्न सकेको छैन । मुख्यबजारमा भएको आगलागी सबैको सहयोगमा नियन्त्रणमा लिन सफल भएकाले थप पसल तथा घरहरुमा क्षति हुन नपाएको स्थानीय वासिन्दाले बताएका छन् ।