कारले ठक्कर दिँदा हेटौँडामा ५ जना घाइते, १ जनाको अवस्था गम्भीर

काठमाडौं । मकवानपुरको हेटौँडामा कारले ठक्कर दिँदा ५ जना घाइते भएका छन् । घाइतेमध्ये १ जनाको अवस्था गम्भीर रहेको छ ।

कान्ति लोकपथअन्तर्गत हेटौँडा– ५, सानोपोखर चोकबाट बजारतर्फ जाँदै गरेको कारले सोही दिशाबाट बजारतर्फ जाँदै गरेका दुईवटा स्कुटरलाई ठक्कर दिँदा पाँचजना घाइते भएका हुन् ।

यस्तै, कारले पैदल यात्री बारा स्थायी घर भएका १ जना पैदल यात्रीलाई समेत ठक्कर दिएको हो । उनको अवस्था गम्भीर रहेको जिल्ला प्रहरी कार्यालय मकवानपुरले जानकारी दिएको छ ।

प्रहरीका अनुसार कारको ठक्करबाट स्कुटरचालक एकजना परुष र स्कुटरको पछाडी सवार महिला घाइते भएका छन् । उनीहरूको शरीरका विभिन्न भागमा चोट लागेको र अवस्था मध्यम रहेको प्रहरीले जनाएको छ ।

यसैगरी, ठक्कर दिने कारमा सवार एक महिला र उनका छोरा पनि घाइते छन् । उनीहरूको अवस्था सामान्य रहेको र घाइते सबैको हेटौँडा अस्पतालमा उपचार भइरहेको प्रहरीले बताएको छ ।