एमालेको यही पाराले मिसन-०८४ ले हावा खान्छ : सञ्चारमन्त्री गुरुङ

काठमाडौं । नेकपा एमालेका उपमहासचिव तथा सञ्चारमन्त्री पृथ्वीसुब्बा गुरुङले एमालेका नेता कार्यकर्ताको कार्यशैलीमा सुधार गर्नुपर्ने बताएका छन् ।

एमाले बागमती प्रदेश सम्पर्क समितिद्वारा आयोजित देउसी भैलो कार्यक्रमलाई सम्बोधन गर्दै उनले एमालेको अहिलेको पाराले मिसन ०८४ ले हावा खाने बताएका हुन् ।

‘अहिले हामीले मिसन ०८४ भनेका छौं। यस्तो पाराले मिसन ०८४ ले हावा खान्छ । त्यो पुरा गर्ने हो भने सबै वामपन्थीहरुको आस्थाको केन्द्र एमाले बनाउनुपर्छ’, उनले भने, ‘सबैलाई एमालेमा ल्याउनुपर्छ । त्यो आयो भने मेरो ठाउँमा त्यो उम्मेवार हुन्छ भन्ने सोचले अगाडि बढ्न सक्दैन । अरु पार्टीका राम्रा नेताहरुलाई ल्याउन पहल गर्नुपर्छ ।’

उनले पार्टीका सबै नेता कार्यकर्ता कमजोरीको पनि समीक्षा गरेर अघि बढ्नुपर्नेमा जोड दिए । उनले कांग्रेस एमाले मिलेर बनाएको सरकारले अपेक्षाअनुसार काम गरेको दाबी गरे ।