देउसी भैलो कार्यक्रममा नाचगान गर्दै प्रचण्ड, दिए १ लाख रुपैयाँ दक्षिणा

तस्बिरः गोपीकृष्ण चापागाईं

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डको निवास खुमलटारमा पुगेर आज लोककलाकार र सञ्चारकर्मीको टोलीले देउसी भैलो खेलेको छ ।

राष्ट्रिय लोक सञ्चारकर्मी नेपालको संयोजनमा उक्त देउसी भैलो कार्यक्रम आयोजना गरिएको हो ।

टोलीमा लोक गायिकाहरु शिला आले, राधिका हमाल, मन्जु पौडेल लगायत थिए भने लोकसञ्चारकर्मी नेपालमा आवद्ध पत्रकारहरु थिए । मञ्जु पौडेलले देउसी भट्याएकी थिइन् ।

प्रचण्ड देउसी भैलो टिमसँग नाचगानमा पनि सहभागी भए । उनले करिब ४५ मिनेट समय देउसी भैलो टिमसँग बिताएका थिए ।

प्रचण्डले देउसी भैलो कार्यक्रम गर्न आएको टिमलाई १ लाख रुपैयाँ दक्षिणा दिएर पठाएका छन् । त्यहाँबाट उनी प्रज्ञा भवन कमलादीमा आयोजित सिस्नुपानी देउसी भैलो हेर्न गएका छन् ।