कपिलवस्तुमा माओवादी नेताको हत्याः चन्दाको विषयमा विवाद,घाँटीमा चक्कु प्रहार,खाल्डोमुनी शव

काठमाडौं । कपिलवस्तुको विजयनगर गाउँपालिका–२ खडैचा भैसीघाटमा कात्तिक ४ गते एक जना पुरुषको शव फेला परेको थियो ।

उक्त शव कपिलवस्तु नगरपालिका-१० तेनुवाका ४५ वर्षीय दिनेश भन्ने जय प्रकाश यादवको भएको खुल्नमा आएको  छ । प्रहरीले खानतलासी गर्दा उनि नेकपा (माओवादी) महावीर समूहका विजयनगर गाउँपालिकाको इन्चार्ज भएको खुलेको हो ।

तत्काल पहिचान हुन नसकेको शव माओवादीका यादवको भएको र हत्यामा उनकै पार्टीका नेताहरु संलग्न रहेको प्रहरीको निष्कर्ष छ । हत्यामा संलग्न रहेको आरोपमा २ जनालाई पक्राउ परेका छन् ।

कपिलवस्तुको वाणगंगा नगरपालिका-२ तिनैयाकी ४६ वर्षीय मनकला थारु र ओखलढुंगाको चिसङ्खुगढी गाउँपालिका-५ सेरनाका ४७ वर्षीय रमेश श्रेष्ठलाई हत्या गरेको आरोपमा प्रहरीले पक्राउ गरेको हो । 

पक्राउ पर्ने श्रेष्ठ उक्त पार्टीको कपिलवस्तु जिल्ला सेक्रेटरी हुन् भने मनकला पार्टीको कपिलवस्तु महिला विभाग प्रमुख हुन् ।

श्रेष्ठ घटनाको मुख्य योजनाकार रहेको र उनले नै यादवको घाँटीमा चक्कु प्रहार र सिमेन्टको पोलले कुटपिट गरी हत्या गरेर शव बालुवामा खाल्डो खनेर पुरेको जिल्ला प्रहरी कार्यालय कपिलवस्तुले जानकारी दिएको छ ।

चिरई भन्ने खोलाको किनारामा कम्मरदेखि माथिको भाग बालुवाले पुरिएको अवस्थामा शव देखेपछि स्थानीयले प्रहरीलाई खबर गरेका थिए । 

घटनाको अनुसन्धानको लागी जिल्ला प्रहरी कार्यालय कपिलवस्तुबाट डीएसपी मोहनमणी अधिकारी र इलाका प्रहरी कार्यालय गणेशपुरबाट प्रहरी निरीक्षक हर्षबहादुर चन्द लगायतको टोली अनुसन्धान खटिएको थियो ।

शव उत्खनन् गरेर प्रहरीले सुरुमा मृतकको पहिचान गर्ने प्रयास थालेको थियो । पछि शवको सनाखत भएसँगै हत्यामा संलग्न अभियुक्तहरुलाई पक्राउ गर्न सफल भएको प्रहरीले जनाएको छ ।

अनुसन्धानका क्रममा मृतक र घटनामा संलग्न व्यक्तिहरू महावीर महासचिव रहेको नेकपा (माओवादी) महावीर समूहमा आबद्ध रहेर केन्द्रीय निर्देशन अनुसार कपिलवस्तु जिल्लामा अवैध चन्दा असुली गर्ने काम गर्दै आएको खुलेको छ । 

कपिलवस्तु जिल्ला सेक्रेटरी श्रेष्ठले समुहको नेतृत्व गरी अन्य व्यक्तिहरुलाई समेत परिचालित गर्ने र विभिन्न व्यक्तिहरूलाई धाक धम्की दिई अवैध चन्दा असुली गर्ने कार्य गर्दै आएको बताइएको छ ।

जिल्लालाई १० वटा ईलाकाहरुमा विभाजन गरी सो मध्येको १० नम्बर ईलाकाको रुपमा छुट्याईएको विजयनगर गाउपालिका क्षेत्रको ईलाका इन्चार्जको रुपमा मृतक जयप्रकाश यादवलाई जिम्मेवारी तोकिएको थियो ।

उनले सो क्षेत्रबाट संकलन गरेको चन्दा रकम हिनामिना गरी पार्टीलाई हिसाव किताव बुझाउन इन्कार गरेको गरेपछि हत्या गरेको आरोपीहरूले बताएका छन् ।

हत्यापछि नजिकैको खोलामा लगी शव बालुवाले पुरेर आरोपि घटनास्थलबाट फरार भएका थिए । घटनामा संलग्न अन्य व्यक्तिहरू भने हाल फरार अवस्थामा छन् ।