डेङ्गु नियन्त्रणमा लाग्न प्रधानमन्त्री ओलीको अनुरोध

काठमाडौं । प्रधानमन्त्री के.पी. शर्मा ओलीले डेङ्गु नियन्त्रणमा लाग्न समाजका सबै वर्गमा अनुरोध गरेका छन् । 

प्रधानमन्त्री ओलीले शुक्रबार भिडियो सन्देशमा देशका केही जिल्लामा डेङ्गुको प्रभाव कायम रहेकाले त्यसको नियन्त्रणमा लाग्न सबैमा अनुरोध गरेका हुन् । 

प्रधानमन्त्रीले हरेक शुक्रबार बिहान १० बजे ‘खोज र नष्ट गर’ अभियान देशव्यापी रूपमा सञ्चालन गर्न सङ्घीय, प्रदेश तथा स्थानीय तहका सरोकारवाला निकाय, निजामती कर्मचारी, सुरक्षा निकाय, शिक्षण संस्था, सामाजिक अभियान्ताका साथै समाजका सबै वर्गको सक्रिय सहभागिताका निम्ति आग्रह गरेका छन् । 

उनले डेङ्गु सार्ने लामखुट्टेको नियन्त्रणका लागि लामखुट्टेको प्रजनन स्थल पानी जम्ने स्थान भएकाले त्यस्ता स्थलको पहिचान गरी लामखुट्टेका लार्भा र प्युपा नष्ट गर्नु पर्नेमा जोड दिएका छन् ।

“नागरिक स्वस्थ भएमा मात्र समृद्ध नेपाल निर्माण सम्भव छ, त्यसैले डेङ्गु नियन्त्रणको यस अभियानलाई सफल पार्न सबैलाई आ–आफ्नो स्थान बाट सहयोग गर्न  अनुरोध गर्दछु”, सन्देशमा प्रधानमन्त्रीले भनेका छन् । 
रासस