गाजा बन्धकको रिहाईमा सहयोग गर्नेलाई आर्थिक पुरस्कार दिने इजरायली उद्यमीहरुको प्रस्ताव

एजेन्सी । एक वर्ष लामो गाजा युद्ध युद्धविराम सम्झौतामा पुग्ने घट्दो सम्भावना बाट निराश भएका केही इजरायली उद्यमीहरूले बन्धक रिहा गर्नेलाई आर्थिक पुरस्कार प्रदान गर्ने फरक मार्ग खोजेका छन् । 

सोडा स्ट्रिमका पूर्व सिइओ डेनियल बिर्नबामले सोमबार एएफपीलाई सामाजिक सञ्जाल एक्समा गाजा बाट जीवित इजरायली बन्धकलाई उद्धार गर्ने जो कोहीलाई एक लाख डलर  नगद वा बिटक्वाइन दिने घोषणा गरे पछि करिब १०० वटा फोनकलहरू प्राप्त भएको बताएका छन् । इजरायलमा आधारित सोडा कम्पनीका पूर्व अध्यक्षले आफ्नो प्रस्ताव बुधवार मध्यरात सम्म मान्य रहेको बताएका छन् । 

बिर्नबामले अधिकांश कलहरू ठट्टा वा धम्की भएपनि त्यस मध्ये १० देखि २० वैध हुन सक्ने र थप प्रमाणिकरणका लागि इजरायली अधिकारीहरूलाई हस्तान्तरण गरिएको जानकारी दिएका छन् । यति धेरै बन्धकहरुका बीच हमास सँग सम्बद्ध नभएका केही नागरिक सँग बन्दीहरूको जानकारी हुन सक्ने बिर्नबामले बताए । 

अक्टोबर ७ ,२०२३ मा हमासले गरेको इजरायली आक्रमणमा २ सय ५१ जनालाई बन्धक बनाइएका थिए । तीमध्ये ९७  जना अझै पनि गाजामा बन्दी रहेको इजरायली अधिकारीहरूले बताएका छन् । 

इजरायलको प्रतिशोधात्मक अभियानले अहिले सम्म गाजामा  ४२ हजार ६ सय ३ व्यक्तिको ज्यान लिएको छ । जसमध्ये अधिकांश आमनागरिक रहेको  हमास द्वारा सञ्चालित क्षेत्रको स्वास्थ्य मन्त्रालयको तथ्याकले जनाएको छ । 

“म सबैलाई फिर्ता पाउने आशा गरिरहेको छैन तर, यदि हामीले एउटा मात्र बन्धक फिर्ता पायौँ भने म खुसी हुनेछु”, बिर्नबामले बताए । उनले यस विषयमा इजरायली सरकार बाट अनुमति नलिएको बताए  । “मलाई लाग्छ वित्तीय पुरस्कारको तत्व निजी क्षेत्र बाट आउनुपर्छ, हेरौँ यसले काम गर्छ कि गर्दैन। हामीले अहिले सम्म जे गर्यौ त्यसले केही काम गरिरहेको छैन ”, उनले भने । 

बिर्नबामको पहलको बारेमा सुनेपछि इजरायली–अमेरिकी घरजग्गा विकासकर्ता डेभिड हेगरले पनि यसका लागि पैसा जुटाउन थालेको बताए । उनले आइतबार इजरायली ‘च्यानल १२’ लाई बताए अनुसार हाल सम्म आफ्ना साथीहरुको सहयोग बाट लगभग ४ लाख डलर जम्मा गरिसकेका र अन्य व्यापारीलाई पनि योगदान गर्न आह्वान गरेका छन् । 
रासस