दल विभाजन गर्ने अध्यादेश ल्याउँदै सरकार, मध्यराति देउवाले जनाए सहमति

काठमाडौं । सरकारले राजनीतिक दलसम्बन्धी अध्यादेश ल्याउनेगरी छलफल अगाडि बढाएको छ । गएराति अबेरसम्म एमाले र कांग्रेसका नेताहरूबीचको भएको छलफलमा अध्यादेश ल्याउने विषयमा सहमति भएको गोप्य स्रोतले जानकारी दिएको छ ।

अध्यादेश ल्याउने विषयमा अगाडिदेखि छलफल भएपनि आइतबार रातिमात्रै कांग्रेस सभापति देउवा सहमत भएका हुन् ।

स्रोतका अनुसार प्रधानमन्त्री केपी शर्मा ओलीले अध्यादेश ल्याउन गरेको प्रस्तावमा कांग्रेस सभापति शेरबहादुर देउवाले सहमति जनाएका थिए । विशेषगरी नेकपा (एकीकृत समाजवादी)लाई विभाजन गर्नेगरी अध्यादेश ल्याउने तयारी भइरहेको हो । 

२०७९ सालको प्रतिनिधि सभा निर्वाचनमा राष्ट्रिय पार्टी बन्न नसकेको एकीकृत समाजवादी पार्टी सरकारले ल्याउन लागेको अध्यादेशप्रति डराएको देखिन्छ । किनकी, प्रतिनिधि सभामा १० जना सांसद् भएको पार्टीमा पछिल्लो केहि समयदेखि माधव नेपालको काम कारवाहीप्रति ५ जना सांसद् असन्तुष्ट देखिन्छन् । उनिहरुले सार्वजनिक रुपमै पार्टी छाड्ने चेतावनी दिँदै आइरहेका छन् । एकीकृत समाजवादीमा असन्तुष्ट भएका कम्तिमा ५ जना सांसद एमालेमा जान तयार छन् । एकीकृत समाजवादीका सांसद प्रेम आलेले माधव नेपालको पार्टीमा नबस्ने निश्चित भइसकेको बताए ।

प्रधानमन्त्री ओलीले अध्यादेश ल्याएर एकीकृत समाजवादी विभाजन गरी ५ जना सांसद्लाई एमालेमा प्रवेश गराउन लागिएको विषय सतहमा आएको छ । माधव नेपालबाट असन्तुष्ट ५ जना सांसद र अन्य साना राजनीनिक दललाई समेत विभाजन गर्नेगरी प्रतिनिधि सभामा नेकपा एमालेलाई सबै भन्दा ठुलो दल बनाउने हिसाबले राजनीतिक दल सम्बन्धी अध्यादेश ल्याउन प्रधानमन्त्री ओली लागि परेका छन् ।

अध्यादेश ल्याउने खबर सुनेपछि एकीकृत समाजवादीका अध्यक्ष माधवकुमार नेपालले त्यसबारेमा बुझ्न कानुनविद गोविन्द बन्दीलाई शुक्रबार शेरबहादुर देउवालाई भेट्न पठाए ।

भेटमा देउवाले आफू ओलीलाई दुखि बनाउने पक्षमा नरहेको जवाफ फर्काएका थिए । यद्यपी कानुनविद बन्दीले भने आफूले देउवसँग भेट नगरेकोे बताउँदै आएका छन् ।

गएराति देउवा र ओलीबीच भएको छलफलमा अर्थमन्त्री विष्णु पौडेल, गृहमन्त्री रमेश लेखक, एमाले महासचिव शंकर पोखरेल र कांग्रेस महामन्त्री गगन थापा लगायतका नेताहरू छलफलमा सहभागी भएका थिए ।

प्रधानमन्त्री ओलीले साँझ ५ बजे बस्नेगरी आजै मन्त्रिपरिषद् बैठक बोलाएका छन् । अध्यादेश ल्याउने विषयमा कुराकानी भएको र आजैको बैठकमा आउने या नआउने यसै भन्न सकिने अवस्था नरहको सत्तारुढ दलका एक नेताले भने ।