बी.पी. राजमार्गमा राति सवारीसाधन चलाउन रोक

काभ्रेपलाञ्चोक । सडक डिभिजन कार्यालय भक्तपुरले बी.पी. राजमार्गमा राति सवारीसाधन चलाउन रोक लगाएको छ । 

रोशी खोलाको बाढीले विभिन्न खण्डमा सडक बगाएपछि वैकल्पिक ट्र्याक निर्माण गरी सोमबादेखि आवागमन खुलाइएको थियो ।

सडक डिभिजन भक्तपुरले बुधबार सार्वजनिक सूचना जारी गरी भकुण्डेबेसी चौकीडाँडा देखि वर्षेखोलासम्म ट्र्याक निर्माण भए पनि मर्मत तथा सुधार गरी यात्रा थप सुरक्षित बनाउने काम भइरहेकाले जुनसुकै समयमा उक्त खण्डमा सुक्खा पहिरो झर्ने सम्भावना हुँदा बेलुकी ६ बजेदेखि बिहानको ४ बजेसम्म धुलिखेल–भकुण्डेबेसी–वर्षेखोला सडकखण्ड बन्द रहने जनाएको हो ।

उक्त सडकखण्ड सञ्चालनमा आएसँगै अहिले बी.पी. राजमार्ग भएर काठमाडौं भित्रिने सवारी साधनको चाप बढेको छ ।