कोशीमा नयाँ सरकार गठनका लागि दलहरु सक्रिय

उद्धव थापा नेतृत्वको कोशी प्रदेश सरकार गठन प्रक्रियालाई सर्वोच्च अदालतले असंवैधानिक ठहर गरेपछि नयाँ सरकार बनाउन दलहरु सक्रिय भएका छन् । सर्वोच्च अदालतले कांग्रेसका नेता उद्धव थापा नेतृत्वको सरकारलाई असंवैधानिक ठहर गरेपछि कांग्रेस, माओवादी केन्द्रसहित गठबन्धनमा रहेका दलले पुनः बहुमत जुटाएर नयाँ सरकार गठनको प्रयास गर्ने बताएका छन् । उता प्रमुख विपक्षी नेकपा एमाले पनि आफ्नै नेतृत्वमा सरकार गठनका लागि पहल गर्ने बताएको छ । सर्वोच्च अदालतले दिएको समयसीमा भित्रै बहुमत जुटाएर दाबी पेस गर्ने तयारी एमालेको छ । प्रदेशको ठूलो दलको हैसियतले आफूहरुको दाबी स्वभाविक भएको एमाले नेता बताउँछन् । सर्वोच्चले आगामी १७ गतेसम्म दुई वा दुईभन्दा बढी दल सहभागी भएको सरकार बन्नका लागि आह्वान गर्नका लागि प्रदेश प्रमुखलाई निर्देशन गरेको छ । यसैविच कोसी प्रदेशको कामचलाउ मुख्यमन्त्रीका रूपमा नेकपा एमाले प्रदेश संसदीय दलका नेता नेता हिक्मतकुमार कार्कीको पुर्नवहाली हुने भएको छ । कार्कीले आज मुख्यमन्त्री तथा मन्त्रिपरिषद्को कार्यालयमा पुगेर कार्यभार सम्हाल्ने तयारी गरेका छन् । उनी साउन १७ गतेसम्म प्रदेशको कामचलाउ मुख्यमन्त्री रहने छन् । ९३ जना प्रदेशसभा सदस्य रहेको कोशी प्रदेशमा सरकार गठनका लागि ४७ जनाको समर्थन चाहिन्छ । कुनै पनि दलको एकल बहुमत नभएकाले बहुमत जुटाउन दुई वा दुईभन्दा बढी दलको समर्थन आवश्यक पर्छ । कोशीमा एमालेका ४०, कांग्रेसका २९, माओवादी केन्द्रका सभामुखसहित १३, राप्रपाका ६, समाजवादीका ४ र जसपाका १ सदस्य छन् ।