फिफा महिला विश्वकपमा जापानद्वारा कोस्टारिका २–० ले पराजित

जापान लगातार दोस्रो जित निकाल्दै फिफा महिला विश्वकप फुटबलको अन्तिम सोह्र नजिक पुगेको छ । आज भएको खेलमा कोस्टारिकालाई २–० गोल अन्तरले हराउँदै जापान प्रि क्वाटरफाइनल नजिक पुगेको हो । पहिलो खेलमा जापानले जाम्बियालाई फराकिलो अन्तरले हराएको थियो । कोस्टारिका भने पहिलो खेलमा स्पेनसँग पराजित भएको थियो । यो समूहमा जापान शीर्ष र स्पेन दोस्रो स्थानमा छन् । अहिले यही समूहका स्पेन र जाम्बियाबीच प्रतिस्पर्धा भइरहेको छ । अहिलेको खेलमा विजयी भए स्पेन पनि अन्तिम सो¥ह नजिक पुग्ने छ । जाम्बिया भने पहिलो जितको खोजीमा छ । आजै साँझ पौने छ बजे समूह बीमा रहेका क्यानडा र आयरल्याण्ड आमनेसामने हुनेछन् । आयरल्याण्ड र क्यानडा दुवै टिम पहिलो जितको खोजीमा हुने छन् । यसअघि आयरल्याण्ड अस्ट्रेलियासँग पराजित हुँदा क्यानडाले भने नाइजेरियासँग गोलरहित बराबरी खेल्दै अंक बाँडेको थियो ।