एभरेस्ट महिला भलिबल: कर्णाली एसभिसको दोस्रो जित, गण्डकी थन्डर्सको दोस्रो हार

काठमाडौं । कर्णाली एसभिसले मंगलबार गण्डकी थन्डर्समाथि रोमाञ्चक जित निकाल्दै जारी एभरेस्ट महिला भलिबल लिग (इडब्लुभिएल) मा दोस्रो सफलता प्राप्त गरेको छ ।

त्रिपुरेश्वरस्थित राष्ट्रिय खेलकुदमा परिषद् (राखेप) कभर्डहलमा कर्णाली एसभिसले उत्कृष्ट पुनरागमन गर्दै गण्डकीमाथि ३–२ को जितसँगै लिगमा दोस्रो सफलता प्राप्त गरेको हो ।

गण्डकी थन्डर्सले सेटमा अग्रता जोगाउन नसक्दा लगातार दोस्रो हार सामना गर्नुपर्‍यो  । सरस्वती चौधरीको कप्तानीमा रहेको गण्डकीले पहिलो २५–१५ ले सहजै आफ्नो बनाउँदै कर्णालीमाथि हाबी हुने संकेत गरेको थियो । तर कर्णाली लयमा फर्कियो । कर्णालीले यो सेट २५–२२ ले रोमाञ्चक जित निकाल्दै बराबरी गर्‍यो । कर्णाली यो सेट जितसँगै उत्कृष्ट लयमा फर्कियो ।

ग्रिसकी अपोजिट हिटर एथानासिया लिएगकी चम्किएपछि लयमा तेस्रो सेट पनि आफ्नो बनाउन सफल भयो । तेस्रो सेट कर्णाली एसभिसले २५–१७ ले सहजै आफ्नो आफ्नो पक्षमा गण्डकीमाथि पूर्ण दबाब बनायो । तर चौथो सेटमा कर्णाली डिफेन्ससँगै तालमेल बिगार्‍यो  । यससँगै गण्डकीले त्यसको फाइदा लिँदै चौथो सेट २५–१९ ले आफ्नो बनायो । यससँगै सेटमा २–२ को बराबरी भएपछि खेलको निर्णयका लागि पाँचौं तथा निर्णायक सेटमा धकेलियो । यो सेटमा कर्णाली एसभिसले सुरुआती देखि नै दबाब बनाउँदा १०–५ को अग्रता बनायो ।