त्रिभुवन विमानस्थलका सबै कर्मचारीको छानविन हुने

त्रिभुवन अन्तर्राष्ट्रिय विमानस्थल भन्सारबाट जाँच पास भएको एक अर्ब रुपैयाँ बढीको सुन बरामद प्रकरणमा भन्सार विभागले सबै कर्मचारीलाई छानबिन गर्ने भएको छ । सुन तस्करीसँग जोडिएको गिरोह र अवैध तस्करी गर्नेबाट प्रेरित भएर भन्सार पास गराइएको हुनसक्ने भन्दै छानबिन गरिन लागिएको हो । प्रारम्भिक चरणमा उक्त सुन जाँच पासमा संलग्न सबैलाई निलम्बनको तयारी गरिएको विभागले जनाएको छ । राजश्व अनुसन्धान विभागले मंगलबार र बुधबार मात्रै दुई दिन लगाएर हङकङबाट भित्रिएको करिब एक क्वीन्टल सुन बरामद गरेको थियो । त्यसमा भन्सार कर्मचारी मिलेको देखिएको छ । विमानस्थलको कमजोर सुरक्षा प्रणाली र कर्मचारीहरूको मिलेमतो नभइ सो सुन भित्रिन सम्भव नभएको विभागको ठहर छ । यसैविच त्रिभुवन विमानस्थल बाहिरबाट राजस्व अनुसन्धान विभागले समाएको सुनको सुराकी दिनेले १० करोड रुपैयाँ पाउने भएका छन् । एक अर्बभन्दा बढी मूल्यको सुन भएको प्रारम्भिक अनुमान अनुसार सुराकी दिनेले सो रकम पाउने देखिएको हो । पहिले सुराकी दिनेलाई १० लाख रुपैयाँ कमिसन दिने नियम थियो । तर चालु आर्थिक वर्षको बजेटबाट त्यो व्यवस्थालाई संशोधन गरेर पक्राउ परेको सामानको १० प्रतिशत पाउने व्यवस्था गरिएको छ । त्यसो हुँदा सुराकीले करिब १० करोड रुपैयाँ पाउने सम्भावना रहेको छ ।