चितवन : सुनचाँदी व्यवसायीहरुले सुनचाँदी कारोवार सम्बन्धी छुट्टै ऐन कानुन निर्माण गरिनुपर्ने माग गरेका छन् ।
नेपाल सुनचाँदी व्यवसायी संघ चितवनको आठौं साधारणसभाका क्रममा व्यवसायीहरुले सुनचाँदी क्षेत्रमा अहिलेसम्म नीति नियम नहुँदा व्यवसाय गर्न अप्ठेरो परेको भन्दैं सुनचाँदी कारोवार ऐन बन्नुपर्नेमा जोड दिएका हुन् ।
नेपाल सुनचाँदी व्यवसायी महासंघका अध्यक्ष माणिकरत्न शाक्यले राज्यले सुनचाँदी व्यवसायलाई उपेक्षा गरेको भन्दैं व्यवसायीहरु आन्दोलनको लागि एक हुनुपर्ने बताए ।
नेकपा माओवादी केन्द्रका सांसद रणेन्द्र बरालीले सुनचाँदी कारोवार ऐन, कानुन निर्माणको लागि आफुले सक्दो सहयोग गर्ने बताए । राज्यले अर्बौंको भ्रष्ट्राचार गर्नेलाई उन्मुक्ति दिने तर सीप देखाएर रोजीरोटी गर्ने सुनचाँदी पेशाकर्मीहरुलाई सम्पत्ति शुद्धीकरणबाट दुःख दिने काम भएको सांसद बरालीले बताए ।
कार्यक्रममा नेपाल सुनचाँदी व्यवसायी महासंघका वरिष्ठ उपाध्यक्ष अर्जुन रसाईली, उपाध्यक्ष विपिन रामुदामु लगायतले व्यावसायिक हकहितका लागि देशभरका व्यवसायी एक हुनुपर्ने बताए । संघका जिल्ला अध्यक्ष डा. यम विकेको सभापतित्वमा भएको कार्यक्रम उपाध्यक्ष उत्सव खातीको संयोजकत्वमा सम्पन्न भएको थियो ।
