ADVERTISING

Breaking News

नेपाली महिला क्रिकेट टिमको युगान्डासँग लगातार तेस्रो हार

काठमाडौं। पहिलो पटक घरेलु मैदानमा टी २० अन्तर्राष्ट्रिय शृंखला खेलेको नेपाली महिला क्रिकेट टिमले युगान्डासँग लगातार तेस्रो हार व्यहोरेको छ। नेपाल युगान्डासँग ६ विकेटले पराजित भएको छ। यस हारपछि युगान्डाले पाँच खेलको श्रृङ्खला दुई खेलअघि नै आफ्नो पक्षमा पारेको छ। पहिलो खेलमा नेपाल युगान्डासँग १२ रनले पराजित भएको थियो। दोस्रो खेलमा नेपाल १ रनले पराजित भएको थियो। कीर्तिपुरस्थित त्रिवि क्रिकेट मैदानमा नेपालले टस जितेर पहिले ब्याटिङ गर्दै ८ विकेट गुमाएर ९९ रन बनाएको थियो। १०० रनको लक्ष्य पाएको युगाण्डाका लागि ओपनर केभिन अविनोले सर्वाधिक ४२, जानेट एमबाबाजाईले २७ रन, रिता मुसामलीले ९ रन बनाइन्। केभिन र जानेटले गरेको ६६ रनको साझेदारी नै युगान्डाको जितको आधार बनेको हो। नेपालका लागि कविता कुँवरले ३ ओभरमा २२ रन खर्चेर २ विकेट लिइन् भने कप्तान रुबिना क्षेत्री र इन्दु बर्माले समान एक एक विकेट लिए। पहिले ब्याटिङ गरेको नेपालका लागि ओपनर ज्योति पाण्डेले सर्वाधिक ४७ रन बनाइन्। ५४ बल खेलेकी उनले ५ चौका प्रहार गरिन्। कप्तान रुबिना क्षेत्रीले १५ बल खेल्दै २ चौका मद्दतमा अविजित १८ रन जोडिन्। अर्की ओपनर बिन्दु रावल ४ रनमा बोल्ड भइन्। तेस्रो क्रममा आएकी सीता राना मगरले १२ रन बनाइन्। युगान्डाको लागि फिनोमा कुलुमी, कोन्की ओन्के र सारा अकितेङले २ र २ विकेट लिए।

leave a reply