६ जिल्लाका ७१ मतदान स्थलका मतपेटिका सदरमुकाम आउन बाँकी

काठमाडौैं । पहिलो चरणमा आइतबार सम्पन्न प्रतिनिधि र प्रदेश सभा सदस्य निर्वाचनको मतपेटिका संकलन कार्य अन्तिम चरणमा पुगेको छ । पहिलो चरणमा निर्वाचन भएका बत्तिस हिमाली जिल्लामध्ये आज दिउसोसम्म छब्बिस जिल्लाका मात्रै मतपत्र सदरमुकाम आइपुगेको निर्वाचन आयोगले जानकारी दिएको छ । आयोगका अनुसार मतपेटिका आउन बाँकी ६ जिल्लाका ७१ मतदान स्थलका मतपेटिका सदरमुकाम ल्याउने कार्य भैरहेको छ । आयोगका अनुसार निर्वाचन भएका २ हजार ९ सय १७ मतदान स्थलमध्ये अब संखुवासभाका नौ, भोजपुरका छ, डोल्पाका २०, मुगुका १०, जाजरकोटका २५ र दार्चुलाका एक गरी ७१ मतदान स्थलका मतपेटिका सदरमुकाम ल्याउने क्रममा छन् । बाँकी मतपेटिका सडकमार्ग र हवाईमार्गवाट ल्याउने काम भैरहेको निर्वाचन आयोगले जानकारी दिएको छ । आज साँझसम्म बाँकी मतपेटिकाहरु जिल्ला सदरमुकाम पुयाईसकिने आयोगले जानकारी दिएको छ । संकलन गरिएका मतपेटिकाहरु दोस्रो चरणको चुनाव नहुञ्जेल ’विशेष सुरक्षा निगरानीमा’ राखिने बताइएको छ । संकलित मतपेटिकालाई जिल्लास्थित मुख्य निर्वाचन अधिकृत, दलीय प्रतिनिधि लगायतको रोहबरमा सुरक्षित स्थानमा सिल गरिएको छ । आइतवार ४ हजार ४ सय ६५ मतदान केन्द्रमा मतदान भएकोमा रुकुममा दुई केन्द्रमा भने आगामी मंसिर २१ गते निर्वाचन हुँदैछ ।।