स्थानीय तह निर्वाचनः सुरक्षाकर्मीलाई भत्तामा विभेद, प्रहरीलाई कम, सेनालाई धेरै

काठमाडौं । स्थानीय तहको निर्वाचन सुरक्षामा खटिएका नेपाली सेना, नेपाल प्रहरी र सशस्त्र प्रहरी बलका कर्मचारीले पाउने विशेष भत्तामा विभेद देखिएको छ ।

निर्वाचनमा खटिएका सबै तहका सुरक्षाकर्मीलाई समान सुविधा उपलब्ध गराउने भनिए पनि सेना, प्रहरी र सशस्त्रले पाउने भत्ता तह र ठाउँ अनुसार फरक–फरक छ ।

प्रहरी प्रधान कार्यालयले प्रत्येक कर्मचारीका लागि खाजा भत्ता र दैनिक भत्ता गरी सात दिनको ५ सयका दरले ३ हजार ५ सय दिएको छ ।

दुई चरणमा हुने स्थानीय तहको निर्वाचनमा सशस्त्र प्रहरी र नेपाली सेनालाई भने ११ हजार दिएको छ । नेपाल प्रहरीका करिब ४५ हजार कर्मचारी, सशस्त्रका करिब ३२ हजार र सेनाका २५ हजार निर्वाचन सुरक्षामा तैनाथ छन् ।

सुगम–दुर्गम र जिम्मेवारीअनुसार, सैनिक जनशक्तिलाई ७ हजारदेखि १० हजार रुपैयाँसम्म भत्ता उपलब्ध गराउने तयारी सेनाको छ । नेपाल प्रहरीका एक कर्मचारीका अनुसार, कम्तीमा ६ हजार दिने भनिएको भए पनि सात दिनको भन्दै ३ हजार ५ सय मात्रै दिने निर्णयले सरकारी विभेद देखिएके एक प्रहरी कर्मचारीले बताए । आजको राजधानी दैनिकमा खबर छ ।