सिरियाको सीमामा सिरियाली डेमोक्रेटिक फोर्स तैनाथ गर्ने अमेरिकी निर्णयको विरोध

टर्की । अमेरिकाको सहयोगमा सिरियाली सीमामा तयार गर्न लागिएको कुर्द फौजलाई टर्कीले आतंककारी सेनाको संज्ञा दिएको छ ।

टर्कीका राष्ट्रपति रेजेप तैयप एर्डोगानले सीमामा अमेरिकी सहयोगमा तयार गर्न लागिएको सिरियाली डेमोक्रेटिक फोर्स ‘एसडीएफ’ भनिने कुर्द फौजलाई परास्त गर्ने प्रतिबद्धता समेत जनाएका छन् ।

तीस हजार कुर्द लडाकुको फौज बनाउने अमेरिकी योजनाले आफ्नो देशभित्रको सुरक्षा चुनौती थपेको टर्कीको भनाइ छ ।

‘एसडीएफ’ बनाउने योजनालाई असफल बनाइदिने चेतावनी पनि टर्कीका राष्ट्रपति एर्डोगानले दिएका छन् ।

अमेरिकी योजनाको सिरियाली द्वन्द्वसँग सरोकार राख्ने सिरिया र रुसले पनि आलोचना गरेका छन । सिरियाली सरकारले अमेरिकी योजनालाई आफ्नो सार्वभौमिकता माथिको ठाडो आक्रमण भनेको छ ।

रुसले अमेरिकी योजनाले विभाजन निम्त्याउन सक्ने चेतावनी दिएको छ । अमेरिकाको सहयोगमा एसडीएफले आईएसबाट दसौं हजार वर्ग किलोमिटर क्षेत्र पुनः आफ्नो नियन्त्रणमा लिन सफल भएको थियो ।

सोही फौजले आइएसले आफ्नो राजधानी समेत भन्ने गरेको उत्तरी शहर रक्कालाई आफ्नो नियन्त्रणमा लिएको थियो ।।