विश्वकप क्रिकेट ट्रफी आज दिउँसो बसन्तपुरमा राखिने

काठमाडौं : विश्व टुर अन्तर्गत नेपाल आईपुगेको विश्वकप क्रिकेट ट्रफी आज दिउँसो बसन्तपुरमा राखिने भएको छ । सर्वसाधारणको अवलोकनका लागि बसन्तपुरमा दिउँसो १ बजेदेखि ट्रफी राख्न लागिएको हो । सगरमाथाको आधार शिविर पुर्‍याईने कार्यक्रम भने रद्द भएको छ ।

एकदिवसीय विश्वकप क्रिकेटको ट्रफी आइतबार राष्ट्रपति भवन शितल निवास पुर्‍याईएको थियो । आइतबार साँझ राष्ट्रपति विद्यादेवी भण्डारीले विश्वकप ट्रफी उचालेकी थिइन । विश्वकप ट्रफि लिएर आएको टोली मंगलबारदुबई फर्कने छ । शुक्रबार साँझ नेपाल आईपुगेको ट्रफि स्वयम्भु र पोखरा र चन्द्रागिरीमा पनि राखिएको थियो ।

सन् २०१९ मा इंग्ल्याण्डमा हुने एकदिवसीय विश्वकप क्रिकेटअघि ट्रफीलाई विश्व भ्रमण गराउने क्रममा चार दिन नेपालमा ल्याइएको हो । तीन महिनाभन्दा लामो विश्व भ्रमणमा रहेको ट्रफी ओमान, अमेरिका, वेष्ट इण्डिज, श्रीलंका, पाकिस्तान र बंगलादेश लगिसकिएको छ । ट्रफीले २१ देशका ६० शहर पुर्‍याइने कार्यक्रम छ । फिफाले विश्वकप हुनुअघि ट्रफी टूर सुरु गरेसँगै क्रिकेटमा पनि आईसीसीले यस्तो सुरुआत गरेको हो ।