राष्ट्रपति भण्डारी र माओवादी अध्यक्ष दाहाल वीच भेटवार्ता, राष्ट्रिय सभा विधयेकमा सहमति खोज्न भण्डारीको आग्रह

काठमाडौं । राष्ट्रपति विद्यादेवि भण्डारी र नेकपा माओवादी केन्द्रका अध्यक्ष पुष्पकमल दाहालबीच आज भेटवार्ता भएको छ । राष्ट्रपति भवन शितल निवासमा भएको भेटमा निर्वाचनपछि नयाँ सरकार गठन, राष्ट्रिय सभा अध्यादेश लगायतका समसामयिक विषयमा कुराकानी भएको बुझिएको छ । भेटमा भण्डारीले विधयेकका विषयमा एउटा राजनीतिक समझदारी बनाउन आग्रह गरेकी छिन् । जवाफमा दाहालले राजनीतिक दलहरुबीच विधयेकका विषयमा केही दिनदेखि छलफल भैरहेकाले चाँडै निकास आउने जानकारी गराएका थिए । नयाँ सरकार गठनका लागि राष्ट्रिय सभा अध्यादेश प्रमाणिकरण हुनुपर्ने देखिएपछि केही समयदेखि राष्ट्रपतिले नियमित जस्तो प्रमुख दलका नेतासँग परामर्श गरिरहेकी छिन् । उनले यसअघि एमाले, कांग्रेस, माओवादी र मधेस केन्द्रित दलका नेतासँग पनि परामर्श गरिसकेकी छिन् । कांग्रेस र मधेस केन्द्रित दल राष्ट्रिय सभा अध्यादेश यथास्थितीमा पारित हुनुपर्ने पक्षमा छन् । नेकपा एमाले भने विधयेक परिमार्जनको पक्षमा छ ।।