मतदान केन्द्र सिफारिसका लागि निर्वाचन कार्यालय बाराले बोलाएको बैठक मोर्चाद्वारा बहिष्कार

 

बारामा स्थानीय तहको निर्वाचनको मतदान केन्द्र सिफारिसका लागि जिल्ला निर्वाचन कार्यालयले बोलाएको बैठकमा संयुक्त लोकतान्त्रिक मधेशी मोर्चाका नेताहरुले बहिष्कार गरेका छन । मतदान केन्द्र सिफारिस समिति बाराले जिल्ला प्रशासन कार्यालयमा आयोजना गरेको सर्वदलीय बैठकमा मोर्चाका नेताहरुले आफनो माँग सम्बोधन नहुन्जेलसम्म निर्वाचनको काम अगाडी बढन नदिने भन्दै बाहिरिएका थिए । सिफारिस समितिले आन्तरिक रुपमै गृहकार्य गरि निर्धारण गरेको मतदान केन्द्रहरुको नामावली अध्ययन गर्न उपलब्ध गराइएको प्रतिवेदन च्यात्दै मोर्चाका नेताहरु बैठकबाट बाहिरिएका थिए । मोर्चाका नेताहरु बाहिरिएपछि अन्य दलका नेताहरुले सिफारिश समितिले उपलब्ध गराएको प्रतिवेदन तथा निर्देशिकालाई अध्ययन गर्न थप २ दिन माँग गर्दै अर्को बैठक डाक्न आग्रह गरेका छन । स्थानीय तह पुनसंरचना अनुसार बारामा दुई उपमहानगर र चार नगरपालिका र ९ गाउँ पालिका गरी १५ वटा स्थानीय तह रहेका छन । निर्वाचन आयोगले प्रत्येक जिल्ला निर्वाचन कार्यालयलाई ५ गते भित्र मतदान केन्द्र सिफारिस गरि पठाउन निर्देशन गरेपनि मधेशी मोर्चाका विरोधका कारण जिल्ला निर्वाचन कार्यालय बाराका लागिचुनौती थपिएको देखिन्छ ।।