भ्यालेन्सियाविरुद्धको खेलमा रोनाल्डोले पाए रातो कार्ड, युभेन्टसको जित

काठमाडौँ : इङग्लिस प्रिमियर लिग च्याम्पियन म्यान्चेस्टर सिटी यो सिजनको युरोपियन च्याम्पियन्स लिग फुटबलको आफ्नो पहिलो खेलमा पराजित भएको छ । गएराति भएको खेलमा म्यान सिटीलाई फ्रान्सको लियोले २–१ ले पराजित गरेको हो । आफ्नै मैदानमा पराजित भएपछि सिटीका प्रशिक्षक पेप ग्वार्डियोला प्रतियोगिताको सुरुमै दबाबमा परेका छन् ।

यही समूहको अर्को खेलमा युक्रेनको शख्तरले जर्मनीको होफनहाईमसँग २–२ गोलको बराबरी खेल्यो । च्याम्पियन्स लिगकै खेलमा स्टार खेलाडी क्रिष्टियानो रोनाल्डोले रातो कार्ड खाए पनि उनको टिम युभेन्टस् भने विजयी भएको छ । भ्यालेन्सिया विरुद्धको खेलको २९ औं मिनेटमा रोनाल्डोले रातो कार्ड खाएका थिए ।

तर १० जनामा समेटिएपनि युभेन्टसले स्पेनिस क्लव भ्यालेन्सियालाई उसैको मैदानमा २–० ले पाखा लगायो ।यही समूहको अर्को खेलमा इङ्लिस क्लव म्यान्चेस्टर युनाईटेडले स्विट्जरल्याण्डको योङ ब्वाईज एफसीलाई ३–० ले पराजित गर्‍यो । च्याम्पियन्स लिगअन्तर्गत समूह ‘जी’को खेलमा स्पेनको रियाल मड्रिडले ईटालीको एएस रोमालाई ३–० ले हराउँदा रुसको सिएसकेए मस्कोले चेक गणतन्त्रको भिक्टोरिया प्लेजेनसँग २–२ गोलको बराबरी खेल्यो ।

यसैगरी समूह ‘ई’को खेलमा जर्मनीको बायर्न म्युनिखले पोर्चुगलको बेनिफिकालाई उसैको मैदानमा २–० ले पराजित गर्दा नेदरल्याण्ड्सको आयाक्स एम्सटरडमले ग्रिसको एईके एथेन्सलाई ३–० ले पराजित गरेको थियो ।