भक्तपुरको हनुमानघाटमा एक महिने माधवनारायण मेला आजवाट शुरु

भक्तपुर । भक्तपुरको हनुमानघाटमा एक महिने माधवनारायण मेला आजवाट शुरु भएको छ । प्रत्येक वर्ष पौष शुक्ल पूर्णिमादेखि माघ शुक्ल पूर्णिमासम्म चल्ने मेलामा माधव नारायण अनुष्ठान गरी माघ पूर्णिमा कथा सुन्ने प्रचलन छ । पौष शुक्ल पूर्णिमाका दिन ब्रत बसेका ब्रतालु अब आउने औंसीदेखि खाली खुट्टा विभिन्न मन्दिर पुग्ने गर्छन । ब्रतालुहरु तीलमाधवबाट तलेजु भवानी, पनौतीको त्रिवेणी, पशुपति र चाँगुनारायण मन्दिरसम्म पुग्ने गर्दछन । माघ शुक्ल पुर्णिमाका दिन भक्तपुर नगरपरिक्रमा गरेर भूपतिन्द्र मल्लको मूर्तिमा ईन्द्रकलश चढाएर ब्रत सकिन्छ । महिना दिनसम्म ब्रत बस्ने ब्रतालुका लागि भने ढल मिसिएको पानीमा स्नान गर्नुपर्ने बाध्यता रहेको माधवनारायण मेला व्यवस्थापन समितिको गुनासो छ । नगरपालिकाले ढलको व्यवस्थापन नगर्दा हरेक वर्ष ब्रतालु ब्रतालु घटदै गएका छन् । हनुमानघाटको त्रिवेणीमा डुबेर स्नान गर्नाले र ब्रत बस्नाले मनले चिताएको पुग्ने विश्वासका साथ भक्तपुरका बासिन्दाले यो ब्रतमा सहभागिता जनाउने गर्छन ।।