नेपाली भाषाको शब्दकोषमा भएको त्रुटि छानविन गर्न प्रज्ञा प्रतिष्ठानद्वारा समिति गठन

 
नेपाल प्रज्ञा प्रतिष्ठानले आफूले प्रकाशन गरेको शब्दकोशमा नै भाषा बिगारिएको आरोप लागेपछि छानबिन गर्न समिति गठन गरेको छ । प्रतिष्ठानको प्राज्ञ परिषदको बैठकले प्रा.डा. चुडामणि बन्धुको संयोजकत्वमा तीन सदस्यीय समिति गठन गरेको छ । समिति सदस्यहरुमा प्रा. डा. नोवलकिशोर राई र सहप्राध्यापक हेमनाथ पौडेल छन् । समितिलाई दुई हजार चालिस सालदेखि प्रकाशित नेपाली बृहत शब्दकोशका बिभिन्न संस्करणहरु परिवर्तन र परिमार्जन गर्दा नियम विपरित के कस्ता प्रयोग गरिएका छन् र यसरी परिमार्जन गर्दा छुटाइएका शब्दहरु खोजी गर्ने कार्यादेश दिइएको प्रतिष्ठानका उपकुलपति गंगाप्रसाद उप्रेतीले जानकारी दिए । बिहीबार आयोजित पत्रकार सम्मेलनमा उपकुलपति उप्रेतीले शब्दकोषमा भएको त्रुटी बारे बिस्तृत अध्ययन गर्न समिति गठन गरिएको बताए । नेपालमा पहिलो पटक संस्थागत रुपमा दुई हजार चालिस सालमा नेपाली बृहत शब्दकोश तयार पारिएको थियो । यसयता शब्दकोष ९ पटक परिमार्जन भएको छ ।।