नयाँ शक्ति र संघीय समाजवादी फोरम एकीकरणको प्रक्रियामा

काठमाडौं । पूर्वप्रधानमन्त्री बाबुराम भट्टराई संयोजकत्वको नयाँ शक्ति नेपाल पार्टी र उपेन्द्र यादव नेतृत्वको संघीय समाजवादी फोरमबीच एकीकरण प्रक्रिया सुरु भएको छ ।

भट्टराई र यादवले आज संयुक्त विज्ञप्ति जारी गर्दै दुई पार्टी एकीकरणका लागि ‘पार्टी एकता संयोजन समिति’ गठन गरिएको जनाएका हुन् ।

समितिमा भट्टराई र यादवका साथै संघीय समाजवादी पार्टीका नेता अशोक राई पनि छन् ।

‘समितिले वर्तमान आन्दोलनमा कार्यगत एकताको माध्यमबाट सहकार्य गर्दै पार्टी एकतालाई यथाशीघ्र तार्किक निष्कर्षमा पुर्‍याउने सहमति भएको’ संयुक्त विज्ञप्तिमा उल्लेख छ ।

विज्ञप्तिमा संघीय गठबन्धन, मधेशी मोर्चा र ६८ दलीय संयुक्त संघर्ष समितिले अघि सारेका माग सम्बोधन गरी निर्वाचनको वातावरण बनाउन सरकारलाई आग्रह पनि गरिएको छ ।