देशभर नै गर्मी बढयो, काठमाडौंमा ३१.५ र नेपालगञ्जमा ४२ डिग्री पुग्यो

काठमाडौं । काठमाडौैं उपत्यकामा आज यसबर्षकै सबैभन्दा बढी गर्मी महशुष भएको छ । मौसम पूर्वानुमान महाशाखाका अनुसार आज उपत्यकामा अधिकतम तापक्रम एकतिस दशमलव पाँच डिग्री सेल्सियस मापन गरिएको छ । न्यूनतम तापक्रम भने १८ दशमलव पाँच डिग्री सेल्सियस पुगेको छ ।

शनिबार काठमाडौँको तापक्रम ३१ डिग्री पुगेको थियो । अघिल्लो वर्ष सन् २ हजार १७ जुन ५ मा काठमाडौँको अधिकतम तापक्रम ३२ डिग्री पुगेको महाशाखाको रेकर्ड छ । तापक्रम एक दुई दिन यही हाराहारीमा रहने मौसमबिदको भनाइ छ ।

केही दिनयता निरन्तर घाम लागेका कारण काठमाडौँ उपत्यकासहित देशभरको तापक्रम बढेको महाशाखाले जानकारी दिएको छ । सबैभन्दा बढी नेपालगञ्जको ४२ दशमलब २ तापक्रम पुगेको छ । अघिल्लो वर्ष जुन ५ मा त्यहाँको तापक्रम ४२ डिग्री पुगेको थियो ।

धनगढीको ४१ दशमलब २, दिपायलको ३९, दाङको ३७, भैरहवाको ३६ र विराटनगरको ३१ डिग्री सेल्सियस पुगेको छ । सबैभन्दा कम ताप्लेजुङको अधिकतम तापक्रम २६ डिग्री सेल्सियस छ ।

प्रि मनसुनको अवस्था रहेको र दुई तीन दिनयता वर्षा नभएका कारण काठमाडौँ उपत्यकासहित देशका विभिन्न भेगमा तापक्रम बढेको मौसमबिदको भनाई छ ।

मौसमबिदले तापक्रम वृद्धि मनसुन सुरु हुनुपूर्वको गतिविधि भनेका छन् । मनसुन सुरु हुन अझै दुई साताभन्दा बढी छ । नेपालमा सामान्यतः जुन १० देखि मनसुन सुरु हुन्छ ।