दरबार हत्याकाण्डको १३ बर्ष पुरा

जेठ १९ गते, तत्कालिन राजा वीरेन्द्रको वंशनाश हुने गरी नारायणहिटी दरवार हत्याकाण्ड भएको दिन । सो हत्याकाण्ड भएको १३ बर्र्ष पुगेको छ । २०५८ साल जेठ १९ गते राति दरवारभित्र भएको पारिवारिक जमघटमा भएको हत्याकाण्डमा तात्कालिन राजा वीरेन्द्रसहित परिवारका ११ जना मारिएका थिए । हत्याकाण्डमा तत्कालिन राजा वीरेन्द्रका साथै रानी ऐश्वर्य, युवराज दीपेन्द्र, अधिराजकुमार निराजन, अधिराजकुमारी श्रृतिसहित ११ जनाको मृत्यु भएको थियो । घटनापछि गठित उच्चस्तरिय छानविन समितिले तत्कालिन युवराज दीपेन्द्रले नै सो घटना गराएको प्रतिवेदन सार्वजनिक गरेको थियो । नेपाली नागरिकले कहिल्यै भुल्न नसक्ने उक्त त्रासदीपूर्र्ण घटनापछि मुलुकको राजनीतिले नै नयाँ मोड लिएको थियो । वीरेन्द्रको हत्यापछि राजा बनेका ज्ञानेन्द्र शाहको शासनकाल प्रारम्भ भयो । तर उनको प्रत्यक्ष शासन गर्ने महत्वाकांक्षाले लामो इतिहास बोकेको नेपालको राजतन्त्र जनआन्दोलन २०६२÷६३ को सफलतासंगै पतन भयो । हत्याकाण्ड भएको नारायणहिटी दरबारलाई अहिले संग्राहलय बनाइएको छ ।।