चौंठचन्द्र पर्व आज महोत्तरी लगायत तराई मधेशमा हर्षोल्लासका साथ मनाइँदै

काठमाडौँ : धार्मिक एवम् सांस्कृतिक पर्व चौंठचन्द्र अर्थात गणेश चतुर्थी आज महोत्तरी लगायत तराई मधेशमा हर्ष उल्लासका साथ मनाइँदैछ । गणेशको पूजा गरी मंगलमयको कामना गर्नु र चन्द्रमाको पूजा गरी मिथ्या कलंकबाट बच्नु नै चौंठचन्द्र पर्वको मुख्य उद्देश्य हो ।

भाद्र शुक्ल चतुर्थी तिथिका दिन बिहानैदेखि पूजा गर्ने महिला दिनभर उपवासमा बसेर साँझ गणेश र चन्द्रमाका साथै अन्य देवीदेवताको पूजा अर्चना गर्ने गर्दछन् । साँझ चन्द्रमालाई विविध पकवानका साथ फल एवम् दही अर्पण गर्ने परम्परा छ ।

पूजा सामग्री सजाइसकेपछि परिवारका सबै सदस्यले हातमा फल लिई चन्द्र दर्शन गर्छन् भने जेष्ठ महिलाले अरिपनमा राखिएका मटकुरी तथा डालीहरू पालैपालो उठाई अर्घ दिने गरिन्छ ।

परिवारको सुख र धनधान्यका लागि चौठचन्दको पूजा गर्ने प्रचलन चलिआएको छ । पूजा सम्पन्न भएलगत्तै सम्पूर्ण परिवार एकै स्थानमा बसेर मिष्ठान्न परिकार खाने गर्छन् । पर्वको अवसरमा श्रद्धालुहरु फल,सुपारी, काँक्रो,पानको पात तथा मिठाई हातमा लिएर दर्शन गर्छन ।