चलचित्र छायाङ्कनका क्रममा बलिउड अभिनेता अक्षय कुमार भक्तपुरमा

बलिउडका चर्चित अभिनेता अक्षय कुमार यतिबेला नेपालमा छन् । चलचित्रको छायाङ्कनका लागि अक्षय नेपाल आएका हुन् । उनी अभिनित चलचित्रको आइतबार हायत होटेल परिसर र सोमबार ठमेलमा छायाङ्कन भएको थियो । छायाङ्कनस्थल वरपर सञ्चारकर्मी तथा सर्वसाधारणलाई निक्कै कडाइ गरिएको चलचित्रको मंगलबार भक्तपुर दरबार परिसरमा छायाङ्कन गरियो । अक्षयकुमार अभिनित चलचित्रको छायाङ्कन हुने थाहा पाएपछि भक्तपुर दरबार परिसरमा ठूलो भिड जम्मा भएको थियो । छायाङ्कन सकिए लगत्तै विश्रामका लागी न्यातपोल मन्दिर नजिकैको हिमालयन जाभामा बसेका उनले त्यहीबाट भिडलाई अभिवादन गरेका थिए । छायाङ्कन अनुमतिका लागी नेपाल चलचित्र विकास बोर्डमा बसन्ती नाम दर्ता गरिएको सो चलचित्रको बारेमा केही सार्वजनिक गरिएको छैन । चलचित्रमा तीन दर्जनभन्दा बढि नेपाली प्राविधिक तथा कलाकार समेत सहभागि छन् । चलचित्रको छायाङ्कनमा लागी अक्षयकुमार शुक्रबार नेपाल आइपु्गेका हुन् । निरज पाण्डेको निर्देशन रहेको चलचित्रकी नायिका तपसी पन्नु पनि नेपालमै छिन् ।