एम्बुलेन्स दुर्घटना हुँदा बिरामीसहित चारजना घाइते

बैतडी । बैतडीमा आज बिहान बिरामी बोकेको एम्बुलेन्स दुर्घटना हुँदा बिरामीसहित चारजना घाइते भएका छन् । घाइते हुनेमा बिरामी दार्चुलाको व्यास गाउँपालिका ६ बसेडीका ५५ वर्षीय विष्णुदत्त भट्ट, उनको साथमा कुरुवाका रुपमा रहेका सोही ठाउँका ४० वर्षीय देवदत्त भट्ट र सोही ठाउँका १८ वर्षीय गणेशदत्त भट्ट रहेको जिल्ला प्रहरी कार्यालय बैतडीले जनाएको छ । यस्तै, एम्बुलेन्स चालक दार्चुलाको मालिकार्जुन गाउँपालिका ८ का २४ वर्षीय गोविन्द धामी पनि घाइते भएका छन । दार्चुलाबाट बिरामी बोकेर धनगढीतर्फ गइरहेको म १ झ १०३ नम्बरको एम्बुलेन्स बिहान ३ बजेतिर महाकाली राजमार्गअन्तर्गत सुर्नया गाउँपालिका ३ धरमघर नजिकै दुर्घटनामा परेको हो । एम्बुलेन्स सडकबाट करिब एक हजार मिटर तल झाडीमा खसेर दुर्घटनामा परेको । घाइते चारैजनाको जिल्ला अस्पताल बैतडीमा उपचार भइरहेको छ । एम्बुलेन्स दुर्घटनाको कारण खुलेको छैन ।।