एकदिवसीय मान्यता पाएर स्वदेश फर्केको नेपाली क्रिकेट टोलिलाई विमानस्थलमा भब्य स्वागत

काठमाडौं । आइसीसी विश्वकप छनोट खेल्न जिम्बावे गएको नेपाली क्रिकेट टोली स्वदेश फर्केको छ । क्रिकेट इतिहासमै सबैभन्दा ठूलो उपलब्धि हात पारेको नेपाली क्रिकेट टोलीलाई विमानस्थलमा भब्य स्वागत गरिएको छ ।

एकदिवसीय मान्यता पाएर स्वदेश फर्केको नेपाली क्रिकेट टोलिलाई विमानस्थलमा खेलकुदमन्त्री जगतबहादुर विश्वकर्माले स्वागत गरे । खेलाडीको स्वागतका लागि नेपाल खेलकुद परिषदका सदस्यसचिव लगायतका पदाधिकारी विमानस्थल पुगेका थिए । टोलीलाई समर्थकले पनि भव्य स्वागत गरेका छन् ।

यसैबिच नेपाली राष्ट्रिय क्रिकेट टोलीका कप्तान पारस खड्काले अबको १० वर्षभित्र नेपाल टेष्ट राष्ट्र बन्न सक्नुपर्ने बताए ।

स्वदेश फिर्ता हुने क्रममा त्रिभुवन विमानस्थलमा भव्य स्वागतका लागि पुगेका खेलप्रेमी तथा पत्रकारहरुसँग नेपाली टोलीका कप्तान पारस खड्काले धेरै वर्षदेखिको सपना पूरा भएको प्रतिक्रिया दिए ।

उनले अब देशलाई नै नयाँ जिम्मेवारी थपिएको उल्लेख गर्दै घरेलु क्रिकेटको संरचना र खेलाडीको हेरचाह पनि अर्को महत्वको विषय भएको बताए ।

नेपालले समूह चरणको खेलमा हङकङलाई र प्लेअफको खेलमा पपुवा नयूगिनीलाई हराउँदै आगामी चार वर्षका लागि एकदिवसीय मान्यता पाएको छ । विश्वकप छनोटमा दोस्रो चरणमा पुग्न नसके पनि नेपाली क्रिकेट टिमले ८ औं स्थानमा खेल पूरा गरेको थियो ।