आज २५ सय ५८ औं बुद्ध जयन्ती, बुद्धको जन्मस्थल लुम्बिनी, बौद्धक्षेत्रमा विशेष कार्यक्रमको आयोजना गरी मनाइँदै

आज २५ सयौं ५८ बुद्ध जयन्ती विभिन्न कार्यक्रम गरी मनाइँदै छ । वैशाख शुक्ल पूर्णिमाका दिन शाक्यमुनि बुद्धको जन्म, बोधिज्ञान र महापरिनिर्वाण प्राप्त भएकाले यस दिनमा बुद्ध जयन्ती मनाउने गरिन्छ । बुद्धको जन्मस्थल रुपन्देहीको लुम्बिनी, उनी हुर्केको कपिलवस्तुको तिलौराकोट दरबार लगाएतका बौद्धक्षेत्रमा आज विशेष कार्यक्रम गरी २५ सयौं ५८ बुद्ध जयन्ती मनाइँदै छ । बुद्धजयन्तीका अवसरमा आज मुलुकका विभिन्न चैत्य,विहार,स्तुप तथा गुम्बाहरुमा भगवान बुद्धको विशेष पूजा प्रार्थना गरी बुद्धजयन्ती मनाइँदै छ । भगवान गौतम बुद्धको शान्ति सन्देश र मध्यमार्गी जीवन दर्शन आज नेपाल, भारत, श्रीलंका, म्यानमार, भुटान, चीन भियतनाम, लाओस, जपान लगायत विश्वभर बौद्धधर्मको रुपमा प्रचलित छ । बुद्धको मध्यमार्गी जीवनदर्शनलाई राज्य सञ्चालनको सिद्धान्त बनाउन सके नेपाली सपुतको दर्शनले नेपाल शान्त र समुन्नत हुने विज्ञहरु बताउँछन् ।