अर्मेनियाको सत्तारुढ पार्टीले प्रधानमन्त्री चयनका लागि चुनावमा उम्मेदवारी नदिने

अर्मेनिया । अर्मेनियाको सत्तारुढ पार्टीले नयाँ प्रधानमन्त्री चयनका लागि हुने संसदीय चुनावमा आफ्नो उम्मेदवार नउठाउने घोषणा गरेको छ ।

राजनीतिक संकटको स्थितीलाई सहज बनाउन मंगलबार हुने निर्वाचनमा उम्मेदवार नउठाउने निर्णय गरेकोे रिपब्लिकन पार्टीले जनाएको छ ।

अर्मेनियाको संसदमा रिपब्लिकन पार्टीको बहुमत रहेको छ । उम्मेदबारी नदिएको रिपब्लिकन पार्टीले विपक्षि नेता पासिनियानलाई पनि मत नदिने जनाएको छ ।

विपक्षी पार्टीका नेता निकोल पासिनियानले सरकारी भ्रष्टाचारविरुद्ध चलाएका आन्दोलनपछि अर्मेनियामा उनीमाथि समर्थन बढ्दै गएको छ ।

पासिनियानले प्रधानमन्त्री पदका लागि जनताको रोजाइमा आफू रहेको बताउने गरेका छन ।

१० वर्ष राष्ट्रपति भइसकेका प्रधानमन्त्री सेर्ज सार्किस्यान विरुद्ध केही समय अघि देशभर भएका प्रदर्शनको नेतृत्व पासिनियानले गरेका थिए । प्रदर्शनपछि प्रधानमन्त्री सेर्ज सार्किस्यान गत सोमबार राजीनामा दिन बाध्य भएका थिए ।